Galatians 4
1Vaikala noxilo ne aloxo 'o. Lexe itema vile 'olu vilesisi ne ili'i la uno'u miumiu momu ne, la uxali loxo anu miumiu muisalili. Ia tei no mine anu mauluxu la anu muxolu loxo itema sou xaixai vitanisi. 2Anu uxolu no laxa'a ane'i ane misaxila'u ilo'a ane'i ane mitulu muuli ulai utalo no anu voxo e momu musosovosou mulovo. 3 aMo nenge kalumo aloxo ne. No mine nenge uao ta molomolo la nenge texolu no laxa'a ta uleenu e misaxila'u loxotolo xe lialia 'o. La mi'oxonenge texali ta mitema sou xaixai vitanisi noxi'a. 4 bIa no anu voxo e Lataua musosovosou muxali manina la mupalusou 'Olu maninasou mulu'e. Nenu mivo'onu muxali loxo itema la muxolu no laaxu lapuloto. 5Anu mu'oxonu aloxo ne mo sou uno'u ulusinge ta mitema texolu no laaxu lapuloto, xe u'oxonenge taxali Lataua ta 'olu.6 cXo ngingi ngexali lataua ta 'olu, la sou Anu mupalusou Uleenu 'Olu ne mune'e muxolu no nano noxinge. Uleenu ne uxolu noxinge la sou uavutilinenge sou ta'ava lexe, “Aba, Mamixe.” 7La sou ngingi ngaxolu loxo ta mitema sou xaixai vitanisi la uasi, ia ngexali loxo Lataua 'olu. Xe no mine nini naxolu loxo Lataua 'olu la nini nalavusou lexe nini namomomo sou nano'u mimii lailaixe noxou e Anu mulalaxiinu sou ulosi'a ta 'olu.
Paulo Tanuxa'a ta Xalatia
8Tei manina la ngingi ngalavusou Lataua uasi, ngingi ngexolu loxo ta mitema sou xaixai vitanisi noxi'a ta mimii e ane'i Lataua uasi. 9Ia vaimomo 'o ngingi ngelavusou Lataua, uasi avikala lexe Lataua mulavusinge. Ia tava'u loxovaa la sou ngingi ngaxiu ngalivu ulai noxi'a ta uleenu ta masumasua mo sou e xavine'i uasi ne. Loxovaa ngingi ngemasaxa lexe ngalivu ngalai ngaxolu no laxa'a mo ngaxali ta mitema sou xaixai vitanisi noxi'a la? 10 dNgingi utotomu ne ngalavusou ngasosovosou voxo ta tatila sou lalotu mo so'io alavua xe lalotu ta tatila sou tauu ie alavua. 11Eni taleli umulinu 'ilixomengi la emama'u, xo loxo 'o io xaixai noxilo e epulipulileli sou e'oxonu ne uxali mii vitanisi.12Ta vivilo, eni linga noxilo toxoxa'a ulai noxinge lexe laixe sou ngaxali aloxo eni 'o. Xo eni ne exali aloxo ngingi ne. Mo ngingi nga'oxonu susu vile une'e noxilo uasi. 13Ngingi ngexavutalanu, tava'u a loxovaa la sou eni ene'e ea'alomengi no anu a'alo laixe tei ne? Xo pipiena vile mu'oxoleli. 14No mine pipiena ne mu'oxoleli la vasimelo mamalaxu la mulosinge tu'umaxu, la ngingi ngamatapialeli mo ngalevetesilo uasi. Ia ngingi nge'osasi sou ngeno'ilo e'una exolu noxinge loxo angelo noxou Lataua vile xe loxo Kalisito Iesu. 15No anu voxo ane ne ngingi nge'osasilo misevile. Ia 'osa'ila noxinge ne mulai 'ava? Eni avikalangengi lexe no anu voxo ane ne ngingi nge'oxonu aloxo ne, anu mumomomo loxo ngingi ngaluvunu iengi lavo'onu la ngalosilo. 16Ia loxovaa, eni elaanu vaikala manina mulai noxinge la sou mu'oxongengi ngemaisilo exali loxo uluamengi, ne?
17Ngalomu, ane'i ta mitema ne iitine'i itulu noxingesi sou inoinge, ia ixavutala sou isu'ulingengi uasi. Ane'i masaxa noxi'a ne sou ikalipalanenge nenge'asi, mo sou ngingi tangengi utulu noxi'asi sou ngasu'uline'i. 18Lexe tanenge utulu manina sou ta'oxonu 'ilixo laixe noxi'a ane'i mose'i la anu laixe. La nga'oxonu utotomu, no mine nenge nenge'a taxoxolu mo no mine nenge nenge'a taxolu uasi kalumo. 19Ta 'alixeni, eni examulinu navunavu iouvilesisi loxo sema ixamulinu navunavu sou ivo'o. Eni examulinu navunavu ane 'o singe, xo eni emasaxa lexe maulixu Kalisito lololinu uxolu noxinge. 20Eni talelingenge manina, xo vaimomo 'o nenge'a taxolu uasi, ia lexe nenge nenge'a taxolu la eni amomomo sou asu'ulingengi no anu vaikala lailaixe mose'i. Ia eni talelingenge manina, xo alavusou lexe asu'ulingengi no anu vote'i a loxovaa uasi.
Axali Ilee Sala
21Ioxe, ngingi ta mitema e ngamasaxa lexe ngaxolu no laaxu lapuloto vaimomo 'o ngavikalaleli. Male ngingi ngalavusou vaivaikala sou lapuloto uasi? 22 eVaikala muai no nano no anu Lavuku Tavuna teinu mua'aloxu Avalaamu lexe anu muxalixa'a ta 'olu ta tamei. 'Olu vile muxalixu noxie sema e ane sema sou xaixai vitanisi xe 'olu vile muxalixu noxie semau mu'isalili. 23 f'Olu ane muxali noxie sema sou xaixai vitanisi ne mupaa no anu vote'i sou taxalixa'a ta 'ilinge 'o. Ia 'olu ane mupaa noxie semau mu'isalili ne muxali no anu vaikala noxou Lataua e musakiinu tei. 24A'alo ane ne anu tovola'isi, xo ta sema ta tamei ne misosovosou opo vilesisi e Lataua musakiinu vaikalasou ta tamei. Axali misosovosou opo vilesisi e Lataua musakiinu vaikalasou tei no laxa'ilu ne Sioni, mo ta 'ilie ne ixali ta mitema sou xaixai vitanisi. 25Axali ane misosovosou laxa'ilu ne Sioni muxolu no xalee lia tila ne Alevia, xe musosovo sou Ielusalemu vaimomo 'o. Xo ane ilo'a ta 'ilie mixali ta mitema sou xaixai vitanisi. 26 gIa Ielusalemu ane vile muxolu teitexi no opo loxotolo ne anu Sala ne anu neninge maninasou ane. 27 hXo vaikala vile muai no nano no anu vaikala noxou Lataua teinu muvikala aloxo 'o.“Nini sema e nalavusou napalaa uasi
mo naxamulinu navunavu sou lavulo'o uasi ne na'osa,
mo nalexe lexe sou 'osa'ila xe na'ava'ava toxotoxoxa'a sou namaxa'u 'osa'ila noxine.
Xo maasi la ta 'iline ixali tavu'alo, ua'ulixe sema e ipapalaa.”
28 iTa vivilo, vaimomo 'o ngingi aloxo Aisaki xo ngingi ngexali Lataua ta 'olu no anu vote'i e anu musakiinu tei. 29 jNo anu voxo ne la molomolo e mupaa no anu vote'isou ixalixa'a ta molomolo ne muxiu la mu'oxonu masuanu molomolo ane mupaa no anu xaviinu Uleenu Tavuna. 30Ia vaikala noxou Lataua muvikala a loxovaa? Anu muvikala lexe, Ngaxexene sema sou xaixai vitanisi ne ilou 'ilie. Xo 'ilie ne umomomo sou ukalipala mimii noxou molomolo e momu muxalixu noxie semau maninasou ne uasi. 31Aloxo ne la sou ta vivilo nenge telavusou lexe nenge texali noxie sema sou xaixai vitanisi uasi, nenge texali noxie sema e ane tilasie sema sou xaixai vitanisi.
Copyright information for
ATA